Parut babinian batianan kalihatan lunjung atau maninggi, tandanya anak nang ditianakan lalakian

Parut babinian batianan kalihatan lunjung, tandanya anak nang ditianakan lalakian.

Tarjamahan (Indunisia): "Perut perempuan hamil kelihatan lonjong, tandanya anaknya laki-laki.‟

Makna:

Tatangar ngini bakisah bahwa mun parut babinian bantuknya lunjung, maka anaknya kaina lalakian. Tatangar ngini adalah pangatahuan sabuting kalumpuk masyarakat, yakni kakiraan macam kalamin nang didasarakan lawan bantuk parut umanya waktu batianan. Pangatahuan ngini masih diparcayai urang sampai wayahini, walau wayahini sudah kawa didukung lawan tihnulugi nangkaya USG. Biar nangkaya ngitu jua, kuasa Tuhan jua nang labih utama dalam manantuakan kabujurannya, jadinya kakiraan USG kawa luput jua.

Tatangar ngini baisi nilai kaarifan masyarakat pasal hubungan manusia lawan Tuhannya. Tatangar ngini bakisah pasal kakiraan manusia nang badasar lawan ciri paawakan, tagal sabarataan babulik pulang lawan katantuan Tuhan. Manusia nang manjadi makhluk ulahannya haruslah ihlas manarima hal-hal nang sudah ditantuakan ulih Tuhannya.