Muhammad Zaini bin Abdul Ghani
Tuan Guru Haji Muhammad Zaini bin Abdul Ghani (11 Pibuari 1942 —10 Agustus 2005) atawa nang rancaknya disambat Guru Sekumpul adalah salah saurang ulama nang paling dihurmati matan Kalimantan Selatan.
Wikipidia baisi tulisan insiklupidia hiwal:
- "Jangan dikira urang nang banyaki bamainan itu kada ingat lawan Tuhan, bisa jadi hatinya tarus baselawat." — KH. Muhammad Zaini bin Abdul Ghani, Rekaman Pengajian Sekumpul.
Papadah
[babak | babak asal-mulanya]Tuan Guru[1]
[babak | babak asal-mulanya]- "Di akhir zaman ngini, ulama banyak diciptaakan, kada mau handak lagi masyarakat baparak, mangaji lawan tuan guru atawa minta papadah lawan tuan guru. Maraga ngitu, bala banyak turun kada kasandangan lagi".
- "Urang nang kada lagi maharagai wan menghurmati ulama, kaina mandapat talu buting bala nang ganal matan Allah Ta'ala, yakni usahanya kada babarakat, para pamarintahannya barataan zholim, yang ketiga, wan waktu mati dicabut iman matan hatinya wan matinya su'ul khotimah".
Bakalakuan pamurah[1]
[babak | babak asal-mulanya]- "Kalo ikam bausaha, imbah ngitu hasil usahanya dibagi tiga, sapalih sagan modal usaha, sapalihnya pulang sagan maungkusi kaluwarga di rumah, wan sapalihnya sagan agama."
- "Urang pamurah ngitu kakasih Allah, walau inya jahil (bungul), wan urang bahil ngitu musuh Allah walau inya alim (pintar). Di lawang surga batulisan: Ikam haram dimasuki ulih urang bahil".
Pamaaf[1]
[babak | babak asal-mulanya]- "Urang nang pahirian atawa urang nang mambicarakan aib kita jangan dilayani, justru lamun (kita) batamuan (lawannya), barii amplup (ka inya)."
Syukur[1]
[babak | babak asal-mulanya]- "Jangan katuju pusang, maraga bila pusang baarti kada basyukur, bila kada basyukur baarti kufur".
- "Saduniaan mawada wan mahina, tagal Allah handak mamuliakan, maka orang ngitu mulia, wan saikung urang mamuji, lamun Allah handak mahinaakan, maka hinalah urang ngitu. Jadi kamuliaan wan kahinaan ngitu lain matan manusia."
Kabujuran[1]
[babak | babak asal-mulanya]- "Jangan maraga takutan kada makan lalu kada wani menyampaiakan kabujuran, maraga amar ma'ruf nahi munkar ngitu kada mangurangi rizki wan kada mahandapakan umur."
Tawadu[1]
[babak | babak asal-mulanya]- "Kadada kalabihan urang Arab wan urang kada Arab, cawali maraga katakwaanya."
- "Bila nang anum malihat nang tuha, hatinya bapandir, urang ne tuha baarti banyak daripada aku ibadahnya. Bila nang tuha malihat nang anum, urang ngini anum baarti kada banyak dusanya."
Kanagaraan
[babak | babak asal-mulanya]- "Urang nang di Prupinsi ulun Kalimantan Salatan, stop, jangan ada nang baulah demo lagi. Kita handaknya badu'a kapada Allah haja, apa kaadaan kita, lapur kapada Allah. Jangan kita marusak kaadaan sasama manusia. Manusia nitu laa hawla walaa quwwata, manulung kada kawa, manyakiti kada kawa. Kita harus bukah kapada nang mandatangakan sasuatu, wan kawa manggantiakan sasuatu. Ampih demo-demo di Kalimantan Salatan. Tarapkan wan tambahi du'a kita kapada Allah satiap tangah malam."
- "Kacaunya nagara, lantaran Allah nang sarik. Sariknya Allah lantaran hukumnya dilanggar, titik. Lamun handak Indunisia wan lain-lainnya ngini aman, babulik ka hukum Allah, tuntung masalahnya. Tagal kanapa hukum Allah kada dikahandaki ulih masarakat wahini."
Nang lain-lain[2]
[babak | babak asal-mulanya]- Rancaki mambaca Qur'an lawan Salawat
- Sabalum makan nasi, rasai dulu uyah sadikit di jari kalingking subalah kanan atawa maulah kuah gasan makan buati uyah sadikit
- Amun handak bakamih ka WC pakai kupiah sakira hapalan kada hilang wan paingatan
- Mamasang kima baju handaknya mulai bawah ka atas
- Utamaakan mamakai salawar baduduk
- Baludah lawan wahin baiknya mahadap ka subalah kiwa
- Sunat bacalak mata sabalum guring
- Di tangan baiknya ada utas nang baandak di jari manis, sabalah kanan atawa kiwa
- Mamakai surban/bulang mun handak sambayang, cukup di rumah aja mamakainya
- Basiwak atawa basikat gigi sabalum sumbahyang
- Imbah tuntung bawudu, baca surah Al-Qadr sambil bajalan manuju wadah panyumbahyangan
- Banyaki baibadah sabaluman manikah, sakira katurunan kita hidup nyaman
- Naraka jahanam sudah mahadang urang-urang nang gawiannya mamikirakan urusan dunia haja
- Kita hidup baiknya mamikirakan dunia sakadarnya aja, kada usah bahimat
- Jam 2 malam sampai Subuh ngitu wayahnya majlis urang salih
- Bila kadada kapantingan kada usah kaluar rumah, amun cagar bakumpul-kumpul kada ngaruan
- Sakira disayangi bubuhan Wali Allah, rancaki mambaca Fatihah gasan buhannya
- Sakaratul maut ngitu nyaman aja gasan urang nang rajin mambaca istigfar
- Urang nang paling cilaka ialah urang nang katuju dipuji urang lain
- Harus siap maampuni wan mamaapakan kasalahan urang lain
- Harus bakasih sayang lawan sasama umat Rasul
- Kisahnya murid sidin asal Pengaron melihat pisang di belakang rumahnya sudah masak wan ranum banar handak mambari ka Guru Zaini di Martapura yang inya cintai, sekalinya ujar sidin. "Tolong bawa bulik haja pisang ni, kaena ditanam di tanah haja, jangan dimakan, karana pisang ni lain ampun ikam. Ingatlah ikam, pisang ni larut kabalakang rumah ikam, tumbuh sampai babuah. Jadi bawa bulik aja, jangan ada yang mamakan. Takajut ae murid ni karena tu paristiwa lawas sudah wan hampir kada ingat lagi. Imbah bulik ka Pengaron dilakuakannya ai dengan penuh keta'zhiman pepadahan Guru Zaini tadi.[3]
- Waktu malam sanayan, pambacaan Maulid Simtuth Durar di majelis Guru Zaini di Kampung Keraton, telah usai. Imbah istirahat setumat, imbah tu dilanjutakan lawan pembacaan Kitab Tafsir Marahu Labid Karya Syekh Nawawi Al Bantani. Panulis waktu tu Kabatulan duduk sakitar baris katiga atawa kaampat dari pusisi Guru. Wayah Guru handak mamulai Pengajian, Panulis ni maambil Kitab matan tas wan mambuka halaman nang dibaca. Imbah tu mancari Pulpen, karana tadi tulak bagasakan sampai kada ingat mambawa. Galisah wan Supan saikit ada, karana sayang tabila pelajaran nang di bari Guru lada di dhobit, dibari catatan. Lawan jua supan kanan kiri mamparhatiakan wan mancatat napa nang disampaiakan Guru. Balum tuntung galisah hati Guru langsung baucap: "Kaya itu pang nang ai bila bagasak-gasak, sampai pulpen tatinggal. Subhanallah padahal penulis waktu tu tahalang panglihatan dari Guru.[4]
- Tun Guru KH. ahmad Zuhdiannor atawa Guru Zuhdi bakisah tantang pertemuan sidin wan guru sekumpul waktu wan abah sidin, Tuan Guru KH. Muhammad, Pengasuh Pesantren Al-Falah waktu tu. Riwayatnya kisahnya Guru Zuhdi handak diserahkan ka Guru Sekumpul hagan dididik ulih Guru Sekumpul. Banyak nang dipandirakan dua sahabat ngini nang memang menurut Guru Zuhdi sudah baangkatan dangsanak. Di akhir percakapan ucap Guru Sekumpul, Muhammad, ikam tahulah anak Ikam kaina lebih alim pada Ikam).[5]
- Sidin suah menunjukakan kaya apa caranya jadi pribadi nang labih dahulu peka hagan di tiru ulih urang lain. Kaya cuntuh H. Rani, suah melihat wan matanya saurang malihat Abah Guru mambarasihi kamar mandi musholla saurangan. Jadi spuntan H. Rani ni handak mambantui sidin. Waktu ditakuni, "Kanapa guru mambarasihi saurang?" Jawab sidin Sadarhana, "Lamun kada dibarasihi kasian jama'ah nang bahadir kasini kaina malihat kamar mandinya nang kada barasih". [6]
Jujuhutan
[babak | babak asal-mulanya]- ↑ 1,0 1,1 1,2 1,3 1,4 1,5 El Kariem (Mei 2015). Figur Karistmatik Abah Guru Sekumpul. Binuang, Tapin, Kalimantan Selatan: Pondok Pesantren Darul Muhibbien.
- ↑ Nur, Muhammad. Deretan Ringkasan Kata Petuah yang Kaya Akan Hikmah dari Abah Guru Sekumpul. medaninsider.com. Dijanaki pada tanggal 8 Marit 2024
- ↑ El Kariem, KH. M. Ansyari (2015). 100 Karamah & Kemuliaan Abah Guru Sekumpul. Tapin: PP Darul Muhibbin. hlm. 66. ISBN 9786027280946.
- ↑ El Kariem, KH. M. Ansyary (2015). 100 Karamah dan Kemuliaan Abah Guru Sakumpul. Tapin: PP Darul Muhibbin. hlm. 93–94. ISBN 9786027280946.
- ↑ El Kariem, KH.M. Ansyary (2015). 100 Karamah & Kemuliaan Abah Guru Sekumpul. Tapim: PP Darul Muhibbin. hlm. 110. ISBN 9786027280946.
- ↑ dkk, Alaika (Summer 2025). "Pendidikam Karakter Abah Guru Sekumpul: Studi Relasi Kuasa Abah Guru Sekumpul dengan Kelompok Tarekat Sammaniyah". Jurnal Pemikiran Keislaman dan Kemanusiaan. 9: 37 – via alaika@unwaha.ac.id.