Ubay bin Ka'ab

Ranak di Madinah lawan ngaran langkap Ubay bin Ka’ab bin Qais bin Ubaid. Ngaran kunyahnya adalah Abu at-Thufail atawa Abu Mundzir al-Anshari. Sidin adalah salah saikung sahabat Anshar matan kabilah Bani Amru bin Malik bin an-Najjar, suku Khazraj. Ahli dalam bidang al-Qur’an al-Karim, wan umpat jua dalam perang Badar wan bai’ah ‘Aqabah. Sidin adalah salah saikung sahabat nang balajar wan mahapal al-Qur’an langsung matan nabi Saw. sampai mandapat ilmu nang dibarakahi. Sidin jua diparcaya Nabi Muhammad Saw. sabagai panulis wahyu Allah Swt.

Papadahan

• Ubay bin Ka’ab suah batakun lawan Rasulullah Saw. “Ya Rasulullah, napa balasan gasan urang nang kana damam?” Rasulullah manjawab: “Kabaikan pacang mangalir lawan inya.” Sidin lalu badu’a: “Ya Allah, sasungguhnya aku maminta lawan Pian panyakit damam nang kada manghalangi aku gasan jihad ka Pian.” Kada lawas imbah itu sidin lalu kasakitan damam.
• Bab Manganai dunia, Ubay suah manggambarakan saparti ini,   “Sasungguhnya makanan manusia ngini kawa dijadiakan umpama gasan dunia, biar dikata nyaman atawa kada, tapi nang panting jadi apa kahujungannya?” Apabila Ubay bapandir di hadapan urang ramai, maka sabarataan gulu pacang tarunjul wan talinga dipasang banar, sabarataannya takajut wan tapikat. Wayah sidin bapandir mangunai Agama Allah, kada saikung pun nang ditakuti sidin, wan sidin kada baisi maksud tasambunyi.”
• “Bahari (wayah Rasulullah balum habis umur) kita sabarataan lawan Rasulullah wan muha-muhanya kita sama haja, imbah sidin maninggalakan kita, muha-muhanya kita lain-lain ada nang manulihi ka kanan wan ka kiwa."
• Siapa haja nang maninggalakan sasuatu karana Allah, niscaya Allah pacang manggantiakan lawan nang labih baik pada arah nang kada dikatahui. Wan siapa haja bakhil lawan razaki Allah, niscaya Allah pacang maambil matan inya matan arah nang kada dikatahui.” Ubay bin Ka’ab radhiyallahu ‘anhu habis umur tahun 21 Hijriah wayah masa khalifah Utsman bin Affan.
• Wasiat Ubay bin Kaab: “Jadikanlah Al-Qur’an sabagai imam (paduman hidup pian). Di dalamnya tadapat undang-undang nang jadi hukum gasan pian. Wan di dalamnya tadapat jua habar tantang umat bahari wan habar tantang urang-urang imbahnya.”
• Nabi ﷺ batakun: “Duhai Abahnya Mundzir, tahu lah pian ayat apa matan Kitabullah nang paling agung?” Karna tawadhu, pamulaan Ubay manjawab, “Allah wan Rasul-Nya nang labih tahu.” Namun wayah dipaksa, Ubay manjawab lawan pas: “Ayat Kursi (QS. Al-Baqarah: 255).” Mandangar katapatan jawaban itu, Nabi ﷺ manapuk dada Ubay lawan bangga wan mandu’akannya: “Demi Allah, mudahan ilmu santiasa mambarasi pian, duhai Abahnya Mundzir!”
• Suatu hari, ada kajadian nang maulah gataran sajarah. Rasulullah ﷺ mandangi Ubay bin Ka’ab lalu bapandir: “Sasungguhnya Allah sudah mamarintahakan lawan unda gasan mambacaakan Surah Al-Bayyinah lawan ikam.”
• Ubay takajut banar. Biasanya murid nang manyaturakan bacaan lawan gurunya, tapi kali ini, Guru Ganal banar (Rasulullah ﷺ) nang diparintahakan mambacaakan ayat lawan muridnya. Lawan suara bagatar, Ubay batakun: “Ya Rasulullah, apa Allah manyambat ngaran ulun lawan pian?” Rasulullah ﷺ manjawab: “Iya, ngaran ikam sakali lawan nasab ikam disambat di Mala’il A’la (langit nang paling tinggi).”